“Monc de Pèsc - Montagne di Pace”:

l recort de la Gran Vera per portèr dant la pèsc

10 egn de storia - 110 egn de memoria

Ai 22 e 23 de jugn Moena sarà viventèda da gropes de rievocadores de la Gran Vera, con passa 60 persones con mondures de duc i corpes che à scombatù su la linies del front anter la Marmolèda e l Pas de Sèn Pelegrin. Te piaz e te dotrei lesc de paisc vegnarà fat su campamenc militères co la desvaliva ativitèdes de chel temp. Ti doi dis dediché al cedean de la Mostra sarà endrezà ence proiezions de filmac originèi, spetacoi, vijites spezifiches a la esposizions e raides su ciampes e trincees del Fanch, dessema coi gropes de rievocadores, per ge dèr l met ai vijitadores de entener dassen la storia.

Vèrda l program dai 22 ai 25 de jugn

Del 2024 l é 10 egn che l é stat orì la Mostra “1914-1918 LA GRAN VERA - La grande Guerra: Galizia, Dolomiti”, metuda fora te Teater Navalge a Moena.  
Per recordèr chest cedean l é stat endrezà n projet che vel tor ite duta la jent del post e no demò tras n program fat de desvaliva scomenzadives fora per l an. 
Chiò sotite porton dant la scomenzadives più significatives.

ATIVITÈDES DIDATICHES TE LA SCOLA LADINA

Ativitèdes per i scolees de la Scola Mesènes, per ge fèr cognoscer a la joena generazions fac e jent de la Pruma Gran Vera te Fascia, per fèr pissèr sora al valor de la pèsc e al gran dejutol de duta la veres armèdes, cheles  passèdes e cheles dal dì d’anché:  

• vijites viventèdes da atores te la sales de la mostra de La Gran Vera, rencurèdes da Ilaria Chiocchetti
• lezions portèdes dant dal curador de la mostra Michele Simonetti Federspiel “Caterina e Giuseppe. Due giovani fassani nella tempesta della Grande Guerra”
• bando “Cognoscer la vera per n davegnir de pèsc” per selezionèr dessegnes e slogan per ladin, che i vegnarà metui fora te na mostra, stampé te n gran format e taché fora te duta la val, con chela de tor ite e sensibilisèr la jent e de ge dèr luster al projet. 

E AMÒ DE AUTRA SCOMENZADIVES…

DIGITALISAZION DEL ARCHIVIE FOTOGRAFICH ZORZI 

Pea via la digitalisazion del Fondo de vera Zorzi, che l  tol ite passa 400 fotografies originèles fates sul front de Fascia e su la Dolomites e regoetes dal pascionà colezionist Walter Zorzi.

FORMAZION PER COMPAGNADORES E ENTERESSÉ 

Vegn endrezà n domesdì dedicà ai compagnadores da mont, ma avert a duc i enteressé, per jir tel fon del tem de la Gran Vera su la Dolomites e fèr entener e portèr dant miec i percorsc e i vièi tematics de Fascia.

“Monc de Pèsc - Montagne di Pace”
l é endrezà da: 

Istitut Cultural Ladin “majon di fascegn”
Sociazion “Sul Fronte dei Ricordi”  
Comun de Moena 
en colaborazion con Apt de Fascia 
e l sostegn finanzièl de la Region Trentino - Sudtirol

Scopri tutti gli eventi