Istitut Cultural Ladin

“majon di fascegn”

L Istitut Cultural Ladin “majon di fascegn” l é una de la istituzions culturèles che laora per l sostegn de la comunanza ladina, mendranza linguistica che vif tel cher de la Dolomites (Tèlia). Ent funzionèl de la Provinzia Autonoma de Trent, metù su del 1975 (statut), l à sia senta tel comun de Sèn Jan (val de Fascia) tel veie e gran ”Tobià de la Pieif”, enlongia ju la calonia de la pieif de Fascia.

Anter i fins de sie statut l é la regoeta, l ordenament e l studie di materièi che revèrda la storia, l’economìa, l lengaz, l folclor, la mitologia, la usanzes e la tradizions de la jent ladina. (chiò l aprofondiment)

Amò apede, l Istitut laora per slarièr fora l lengaz e la cultura ladina tras i media, l colaborea con la scola per valorisèr e svilupèr l ensegnament del lengaz e l dèsc sie contribut per l’organisazion de n program permanent de alfabetisazion di gregn.

L colaborea ence col Comun General de Fascia e co la sociazion del teritorie te la organisazion de evenc e manifestazions de desvaliva sort.

A l’atività de documentazion e de enrescida corespon na produzion editorièla zis rica che tol ite l bolatin “Mondo Ladino” (dal 1977), la lingia “Mondo Ladino Quaderni” dedichèda al mond de la scola, e amò monografies, dizionères, regoetes de tesć, libres per bec, cataloghes, materièi audiovisives, per en dut passa 100 titoi. (Publicazions, Shop).

L empegn tel ciamp de la enrescida etnografica à portà a la costituzion del Museo Ladin de Fascia, con sia senta zentrèla averta de messèl del 2001, pont de departida de n percors etnografich che mena a cognoscer la cultura de Fascia (Museo sul teritorie)