Pigui Experience

Melaur Ladin da salvèr

PIGUI EXPERIENCE! Virtual reality game 

La realtà virtuèla é ruèda te Museo Ladin

L Museo Ladin de Fascia l met a la leta n nef alestiment de realtà virtuèla, te la sala “I prumes tempes / Le origini” dichèda a la Presitoria e ai reperc archeologics de la pruma popolazions retiches de la val. Na neva che à chela de sparpagnèr fora la cognoscenza de chest moment storich, tras la doura de tecnologies inovatives engaissegoles e de interazion.
PIGUI EXPERIENCE Virtual reality game l é la pruma esperienza de imerscion dedichèda a la storia de la popolazions che zacan stajea te Fascia, che la se met dant de ensegnèr e fèr cognoscer tras l jech.

Chesta esperienza vituèla, de prescipech 20 menuc, se podarà la fèr tras n visor imersif che l porta i utenc tel vilaje preistorich di Pigui, olache l é stat troà la testimonianzes archeologiches de la pruma popolazions retiches de Fascia.
Desche te n stargate olache se va ite te n mondo che l ge somea più che l é meso a la realtà, l jiador vedarà vegnir fora pian pian l vilaje condanà da na malediscion. Sarà el l eroe che, jian con elements storics e reperc archeologics, l portarà endò pèsc, salvan i abitanc emprijoné. L é chest l spas de n percors de cognoscenza che ge va do inout ai ogec troé tel sit archeologich di Pigui e metui fora te la sala de Museo che ge é stat dedicà.
L é na endesfida da marevea, curiousa e inovativa che la tolarà ite l vijitador te na metafora fina ma segnificativa: l eroe vituèl, a chel che ge vegn dat su l’encèria de salvèr l vilaje da na zis burta malediscion, l vegnarà de retorn te la realtà en consaputa de l’emportanza de stravardèr la cultura e la storia de na mendranza linguistica unica e preziousa.

PIGUI EXPERIENCE Virtual reality game pel vegnir fat da duc dai 9 egn en su e con demò 2 euro en più che l cost del biliet del Museo Ladin de Fascia.

Met vèrda: chesta esperienza vegn fata con teconologies imersives. La doura de dispositives VR (vijores imersives) la é per bec dai 9 egn en su e no la é adatèda a femenes che speta, jent malèda de epilessia, jent con desturbes al cher o a la vista, jent con pace-maker, impianc cocleères e aparac acustics.
Lec la informativa.