Mediateca Ladina

CHE él?

L é na piataforma web che dèsc l met de ruèr apede a na gran lingia de prodoc editorièi e de materièi didatics de utol per la cognoscenza e a la difujion del lengaz ladin, metui a jir dal Istitut Cultural Ladin e da la Scola Ladina de Fascia col contribut de la Region Autonoma Trentin-Südtirol. Filmac, file audio, toc de musega, tesć de letradura e etnografics pel esser vardé co la modalità responsive, o ence desćiarié debant sun dispositives personèi, desche ence de etres suporc de la medema sort, a la leta te desvalives formac (file de test, traduzions, dessegnes, partidures, e c.i.), che pel vegnir duré per l ensegnament del lengaz e de la cultura ladina. L zil l é chel de spartir con più utenc che l é meso i materièi e de portèr dant n “bon model” de lengaz apede a contegnui culturèi de calità dal pont de veduda de la cognoscenza e de la didatica. La dinamizità de la piataforma dèsc l met de revijionèr aldò del besegn, de comedèr e ajornèr do e dò, a na vida che i utenc posse aer sobito a la leta, con n clic, duta la novitèdes portèdes dant che jirà a smaorèr n archivie semper a la leta per la consultazion e la enrescida.

Japede la piata te troes i links per l azes.