La Sia

La sia de Penia l é la ultima sia "a la venezièna" amò en funzion te duta Fascia. Documentèda jà tel sec. XVI, anchecondì la se prejenta te sia strutura realisèda del 1929 dal marangon Giacom “Giochelon” da Pardac.

L restaure portà a compiment ti egn 1985-88 da Giuseppe Longo da Tieser à permetù de recuperèr deldut la strutura. Anchecondì la vegn metuda a jir d’istà per desmostrazion.

De retorn a la mapa

L Molin

L Molin de Pezol, de proprietà de la familia Rizzi (Salin) jà dal Otcent, l va amò aldidanché e sie enjignes per majenèr i é formé da doi moles per la bièves e l pestin per l orc, metui a jir da trei gran rodes da pèles.

Amò apede l é ence la piles (n sistem primitif a moviment vertical per pestèr l òrc), l molin da vent e duta l'autra massaries del moliné.

Restaurà dal artejan Giuseppe Longo da Tieser e inaugurà tel 1983, l Molin de Pezol l é stat la pruma sezion locala del Museo Ladin.

De retorn a la mapa

L Malghier

La sezion del Museo Ladin la é loghèda te la senta de la Mèlga de Fascia e la é dedichèda a la èrt veiora del arlevament e del fèr smauz e formai, ativitèdes che ti secoi à caraterisà l sistem economich de la Comunità de Fascia.

L lurier col lat, col smauz e col formai e la gestion comunitèra di pèscoi e de la monts tel jir di secoi i vegn despieghé tras ojec, tesć e fotografies che vegn cà da l'atività de regoeta etnografica portèda inant da Istitut Cultural Ladin per passa trent'egn, per ruèr enscin aldidanché e poder veder, tras la sales de produzion, coche laora la Mèlga anchecondì.

Do la vijita se podarà cercèr duc chisc prodoc te la boteiga ló apede.

De retorn a la mapa

L Segat

La Sezion sul teritorie de “L Segat” la é nasciuda, jà da sia projetazion, desche na strutura museèla caraterisèda da na gran atenzion a la didatica, che se compagna a la Sezion de “La Sia” ta Penia. Dedicà soraldut al confront anter la sies tradizionèles a èga e la tecniches modernes che se doura a lurèr l legnam, chest spazie dèsc ence l met de cognoscer duc i setores produtives leé al lurier del bosch.

A peèr via da la emportanza del desfrutament del bosch per la comunanza de Fascia ti secoi, se podarà cognoscer la essenzes prinzipèles del post e cognoscer trei mestieres leé al lurier primèr del legnam: l boschier, l segat e l marangon.

Vigniun de chisc setores l é prejentà da tesć, retrac storics, ojec etnografics e filmac touc su ti egn dal Istitut Cultural Ladin. Anter chisc, se tol fora la gran colezion “Bepo e Jan Cherlo” da Moena, ritajon de na familia de marangons da cater generazions.

L é stat possibol meter a jir chesta sezion de gra a la colaborazion co l’A.S.U.C. de Poza che à metù a la leta la sales de la Sia de Meida, metuda a nef, e co la Scola Ladina de Fascia che à tout pèrt ai momenc de projetazion e a la realisazion di materièi didatics col projet “Dò l troi del legn”.

De retorn a la mapa

L Stont

Te duc i maores paijes e te vigni zità del veie Tirol l era n lech olache i omegn bogn de durèr èrmes da fech se arcedèa a trèr al tulac: n picol fabricat de legn o de mur, con n gran avertor da olache se podea spièr i tulaces, metui a desvaliva distanzes.

L spirit de la veiora milizies populères, che n’outa aea da defener la patria tiroleisa, recognosciudes da l’Emperador del 1511, l é passà tel Otcent te la libera sociazions di Standschützen, chiamé Scìzeres per ladin e “Bersaglieri immatricolati” per talian.

L Stònt imperièl-regio comunèl de Ciampedel l é la soula testimonianza de na storia secolèra, conservà enscin aldidanché te val: fat su del 1905, l é stat en doura enscin canche l é crepà fora la Gran Vera.

De retorn a la mapa

1914-1918 “La Gran Vera”: Galizia, Dolomites

Per i cent egn dal scomenz de la Gran Vera, l Comun de Moena, l Istitut Cultural Ladin e la Sociazion culturèla “Sul Fronte dei Ricordi”, col sostegn del Comun General de Fascia, i à realisà na esposizion tematica che porta dant i evenc de vera dal front austro-rus (Galizia-Bucovina-Volina) enfin a la vera a l’auta sui monts de Fascia e Fiem, per recordèr no demò i fac storics ma soraldut sie efec su la jent del post.

Cher de la esposizion l é dantdaldut la colezion “Simonetti - Caimi”, con passa 20 mondures da zacan, reperc, retrac, e c.i., en dut beleche mile toc che l é stat metù a la leta dal Museo Ladin de Fascia, con apede amò da etres reperc de colezions privates.

La mostra se dejouc sun cater sezions staboles (Galizia 1914, La trincea, Dolomites 1915 e Vera a la Vera!), che troa lèrga ti gregn spazies del Teater Navalge de Moena, olache vegn dant un do l auter diorames zis scenografics, vedrines tematiches, placac con tesć, retrac da zacan e gigantografies, che met ensema na esposizion de presciapech 500 metres cadrac. Amò apede, ogne an la mostra tol ite na sezion temporana dedichèda a n tem particolèr: "Èrt e Standschützen", "1916: Taliegn al Assaut!" e per l'istà 2017 "Richard Löwy, n judier a Moena".

Ideadores e curadores de la mostra l é Michele Simonetti Federspiel e Mauro Caimi, conservadores onorères del Museo Ladin; i alestiments i é stac realisé col didament operatif di volontadives de la Sociazion “Sul Fronte dei Ricordi”, che se cruzia ence de endrezèr i percorsc vidé sui lesc del front sun Costabela, Sèn Pelegrin e Boce.

De retorn a la mapa

Booklet - The territorial branches

Download ITALIANO/LADIN

Download DEUTSCH/ENGLISH